Sunday, September 21, 2008

أول يوم هناك


طب انا راضي ذمتكوا وذمة اي مواطن مصري او أمريكي او مزدوج الجنسية تعدي من العمر خمس سنوات ..لو ساقك القدر انك تروح أمريكا .. وكمل سواقه بيك علي ولاية في نص أمريكا أسمها نبراسكا .. واول ليله توصل فيها الولايه دي .. في نفس ذات اليوم يعني .. وانت ماشي في البلد الهادية واللي ترمي فيها الدبوس .. يعمل ترنرنرن .. وتسمع صداه عشر مرات
وتقوم خير اللهم ما اجعله خير .. تلاقي زحمه كده وناس جايه عليك بتجري .. واللي علي هدومه دم .. واللي ماسك سكينه .. واللي بيدخل إيديه في وشك وانت مش فاهم هو بيقول ايه .. بس هو بيزعق ...واكنك فجأه بقيت جوه لعبه من لعب هاوس اوف بلود ولا حاجه .. بدون ادني تهويل !
تعمل ايه .. وانطباعك هيكون عن البلد دي واهلها وناسها ايه ؟!
ستر ربنا ان الموقف ده لما حصل .. كان معانا صديق من جامعة نبراسكا .. وهو اللي حاول يفهمنا ان الليله دي زي ليله عيد معين عندهم ..
بس اعتقد ان لو " لوك " صديقنا اللي من جامعة نبراسكا .. مكانش موجود معانا .. اكيد كنت هشاور لأي تاكسي رايح المطار تاني واقعد هناك لغاية معاد الطيارة بدل مدينة الأشباح دي !
الغريب بقي بعد ما فعهمت وتأكدت إنهم بيهرجوا .. وناس رايقه وفايقه .. قولت ياواد القط كام صورة .. ولما روّحت قولت اشوف الصور .. بصراحه لقيت صورة متطمنش .. فيها ظاهر حاجات غريبه .. قلت ياواد صدق ان دي كشافات النور ولما ضربت في الكاميرا .. عملت المنظر ده .. بصراحه قلت اصدق احسن عشان اعرف انام ..


وطبعا مش محتاج اني احلفلكوا ان الصورة مش داخل فيها اي تعديلات .. انا معنديش حاليا اي سوفت وير لتعديل الصور اصلا



النهارده لفيت في البلد شوية .. وانت ماشي في كل اركان البلد .. مش هتلاقي حد ماشي علي رجليه .. ولا حتي هتلاقي تكسيات .. لان الطبيعي ان كل الناس عندها بيوت .. وكل الناس عندها عربيات .. وكل الناس عندها شغل " سبحان الله " ومعدل الجريمة منخفض لدرجة انه في سنه كامله ميزيدش عن اربعه او خمسه جرايم !
سامعك ياللي بتقول زي عندنا في مصر بالمللّي
بس بقي بلا مصر بلا ميكانيكا فاضية .. انا حالف عالتلت كتب قبل إني مش هعقد اي مقارنات وادخل فيها مصر .. مصر فوق اي مقارنات يارجاله :D

4 comments:

zeinab said...

أيوة يا محمود إحنا اتفقنا من اللحظة الأولى إن مش هنقارن:)

Mahmoud Saber said...

ايوون
بس سيبك انتي .. شفتي العفاريت ؟

An Egyptian said...

على فكرة العفاريت بتطلع فعلا فى تجمعات الرعب دى نوع من انواع استقطاب الطاقة للطاقة
نصيحة اخوية تجنب التجمعات دى لو مش عاروز ترجع مصر مجنون

Mahmoud Saber said...

:))